Conceptos Básicos de Demografía e Poboación en Galego

Censo de poboación

Recompilación de datos relativos ao número de individuos que compoñen unha determinada poboación e as súas principais características (demográficas, socioeconómicas, socioculturais, etc.). Realízase nos anos rematados en 1.

Crecemento real

Variación do efectivo dunha poboación durante un período de tempo, resultado do balance entre o crecemento natural (ou vexetativo) e a migración neta. A fórmula é: CR = CV + SM ou CR = (TN - TM) + (I - E).

Crecemento vexetativo

Tamén chamado crecemento natural, mide a variación do volume dunha poboación durante un período de tempo debido ao balance entre nacementos e defuncións. A fórmula é: CV = TN – TM, e exprésase en %.

Densidade de poboación

Relación establecida entre o número de individuos que compoñen unha poboación e a superficie que ocupa. Exprésase en habitantes por quilómetro cadrado (hab./km²).

Emigración

Desprazamento dun individuo desde un territorio cara a outro distinto. Pódese distinguir entre unha emigración interior ou exterior segundo se realiza ou non dentro dos límites dun Estado. As causas son fundamentalmente económicas.

Esperanza de vida

Cálculo do número medio de anos que un individuo pode esperar vivir, ben no momento de nacer ou cando acada unha determinada idade, sempre que os niveis de mortalidade permanezan constantes. En España, en 2005, era de 83,9 anos para as mulleres e 77,4 para os homes.

Estrutura demográfica

Composición dunha poboación en función dunha serie de variables: sexo, idade, actividade profesional, estado civil, nivel de instrución, etc.

Éxodo rural

Fenómeno migratorio que implica o cambio de residencia da poboación do medio rural cara aos núcleos urbanos. Estas migracións supoñen, xeralmente, o cambio de actividade económica (do sector primario ao secundario ou terciario).

Índice de envellecemento

O índice de envellecemento calcúlase poñendo en relación o grupo de idades de máis de 65 anos co grupo de 0 a 15 anos. Se o resultado é igual ou superior a 1 (ou ao 100%, segundo a fórmula), a poboación comeza a amosar claros signos de envellecemento.

Inmigración

Traslado de poboación cara a un espazo concreto, de tal xeito que, para os habitantes do espazo receptor, esa poboación constitúe un fluxo de inmigrantes.

Movemento pendular

Desprazamento que realiza unha persoa desde o seu lugar de residencia ao lugar onde traballa, movemento que a maioría das veces é de carácter diario.

Nomenclátor

Relación das entidades de poboación que conforman un determinado territorio. O nomenclátor español inclúe datos de poboación, vivendas, distancias quilométricas, altitude, etc., dos distintos municipios.

Padrón municipal

O padrón municipal de habitantes é un rexistro administrativo público e fidedigno para todos os efectos, que contén a relación dos habitantes dos termos municipais (nome, apelidos e domicilio) con algunhas das súas características. A diferenza do censo (que é un documento estatístico e secreto, realizado cada 10 anos e centrado en máis variables como matrimonios, nacementos, defuncións, etc.), o padrón actualízase continuamente e é a proba da residencia no municipio.