Marxismoaren Eragina Gaur Egungo Munduan

Marxen Eragina Ondorengo Munduan

Marxismoak garrantzia izugarria izan du bai politikan, bai filosofian, eta baita beste hamaika diziplinatan ere. Marxek eta Engelsek beti izan zuten politika egiteko borondate esplizitu bat, Marx eta Engelsena akziorako teoria bat zelako, edo, era zehatzagoan esateko, iraultzarako teoria bat. Beraiek izan ziren askapenerako teoria eta praktika lotuak egon behar direla erakutsi zuten filosofo nagusiak.

Honetaz gain, munduko ia herrialde guztietan existitu dira marxismoak inspiratutako antolakunde sozialistak; batzuk, aurreko mendean masiboak izan ziren. Baita zapalkuntza espezifikoak borrokatzeko helburua zuten antolakundeek ere, hala nola AEBetako Pantera Beltzek edo ETAk, marxismoaren eragin handia zeukaten.

Deskolonizazioan Izandako Pisua

Aipagarria da, baita ere, marxismoak deskolonizazio prozesuetan izandako pisua. Hona hemen adibide batzuk:

• Kwame Nkrumah (Ghana) eta Thomas Sankara (Burkina Faso), ikuspegi marxista batetik Afrikaren deskolonizazioaren alde borrokatu zuten bi figura paradigmatiko dira.

(Ghana independentzia lortu zuen lehen herrialde afrikarra izan zen.)

XX. Mendeko Aldaketak

XX. mende bukaerarako, SESBen erorketarekin bat eginez, marxismoa baztertua izaten hasia zen akademiatik eta politikatik. Marxismoarekin batera, sozialismoaren ideiak popularitatea galdu zuen. Sozialismoaren ideiak eta marxismoak mundu osoko masen artean indar handia eduki zuen; gaur egun, ordea, sozialismoa utopia gisa ikusten da.

Marxismoaren Gaurko Egoera

Dena dela, gaur egun, asko dira marxismoaren kontzeptuak errealitatea aztertzeko egokiak direla esaten dutenak. Era berean, ezin dugu esan, inolaz ere, benetako berdintasunaren eta askatasunaren aldeko jarrera etikoa desagertu denik. Kontrakoa: bizi dugun krisi eta aldaketa garaian, gero eta gehiago dira marxismoara jotzen dutenak errealitatea aztertzeko, sozialismoaren aldarria berreskuratuz.

Eztabaidak eta Eragina Politikatik Kanpo

Esfera politiko ezberdinetan oraindik eztabaida egoten jarraitzen du Marxek mahaigaineratutako auzi askoren inguruan, eta eztabaida dago, baita ere, marxismoa eta bestelako proposamen politikoak uztartzeko moduaren inguruan. Beste alde batetik, teoria eta praktika bereiziz, aipagarria da kontzeptu marxista asko izugarri zabalduak eta onartuak daudela, politikaren esferatik at ere.

Ondorioa

Aipagarria da, bukatzeko, marxismoa ideologia arriskutsutzat hartzen dela oraindik, eta herrialde batzuetan debekatua dagoela komunismoa.