Kirol-lesio ohikoenak: Hausturak, Osteonekrosia eta Esginzeak

Hausturak

Haustura hezur baten haustura da, zati batekoa edo osokoa. Kasu gehienetan traumatismo baten ondorioz gertatzen denez, prebentzioa ez da erraza. Gehienetan kontaktuko kiroletan gertatzen dira eta gorputz-adarretan izaten dira maiztasun handienarekin.

Klinika

• Mina eta ezintasun funtzionala (apurtutako hezurra ez da ondo mugitzen).
• Hantura (hematomagatik) eta ekimosia.
• Haustura osoa bada eta hezurra lekutik mugitzen bada, desitxuraketa bat ere ikusiko da.

Tratamendua

• Lesioa estali behar da (zauririk egonez gero, benda edo zapi garbiekin).
• Gorputz-adar mindua euskarri baten bidez inmobilizatu eta, ondoren, altuago ipini daiteke.
• Kirolaria osasun-zentro batera eraman.

Osteonekrosia

Trakzioko ekintza mikrotraumatikoengatik gertatutako lesioak dira, eta umeei zein nerabeei hezurraren nekrosia eragin diezaiekete. Ohikoenak tibiaren aurreko tuberositatean eta kalkaneoaren atzeko apofisian izaten dira.

Klinika

• Mina eta hantura.
• Funtzioan nolabaiteko eragina.

Tratamendua

• Mina eragiten duen aktibitatea eten.
• Hotza ipini eta bendaje batez inmobilizatu.
• Medikuarengana jo.

Estresak eragindako hausturak

Eskeletoan denbora luzean eta jarraian karga bat ipintzearen ondorio dira. Gehienetan tibian, peronean eta metatartsoan gertatzen dira.

Klinika

• Esfortzuarekin batera agertzen den mina da, atsedenarekin desagertzen dena.
• Denbora pasa ahala, atsedenarekin ere badirau.
• Batzuetan lekuan lekuko hantura txiki bat ager daiteke.

Tratamendua

Tratamendu nagusia atsedena da.

Esginzeak edo zaintiratuak

Zaintiratu bat lotailu baten haustura da, osoa edo zati batekoa; beraz, giltzaduretako lesio bat da. Giltzaduretako mugimenduak neurriz kanpo behartzen direnean sortzen dira. Gehienetan orkatilean, belaunetan, atzamarretan eta eskumuturrean izaten dira.

Klinika

• Mina eta ekimosia.
• Hanpadura eta giltzaduraren desegonkortasuna.

Tratamendua

• Ez da giltzadura mugitu behar eta kargak saihestu egin behar dira.
• Lehenengo 24-48 ordutan ez da masajerik eman behar.
• Inmobilizatu, bendatu eta osasun-zentro batera joan.