Barne migrazioak: tradizionalak eta gaur egungo korronteak

Barne Migrazioak

Herrialde baten mugen barruan gertatzen diren biztanleria-mugimenduak dira. Bi mota nagusi daude: tradizionalak eta gaur egungoak.

Barne Migrazio Tradizionalak

Ezaugarriak

• XIX. mendearen azken herenaren eta 1975eko krisi ekonomikoaren artean izan ziren.

• Migrazioaren bolumena oso handia izan zen.

• Zergatia lana lortzea izan zen nagusiki.

• Emigratu zuten pertsona gehienak gazteak ziren, kualifikazio-maila apalekoak.

• Migrazio-korronte gehienek noranzko bera izan zuten: landatik hiri industrializatu edo zerbitzu-hiri handietara.

Barne Migrazioko Korronte Tradizionalak

Urte-sasoiko edo Aldi Baterako Migrazioak (1870-1970)

Asmoa itzultzea izaten zen. Bi mota bereizten dira:

• Urte-sasoiko lekualdatzeak, landa oso gutxi mekanizatuta zegoenez, nekazaritza-lanak egiteko.

• Hirirako aldi baterako lekualdatzeak, landan lan gutxiago zegoen urte-garaietan, nekazaritzakoak ez ziren lanak egiteko (eraikuntzan, industrian edo zerbitzuetan).

Nekazarien Exodoa (1870-1975)

Landa-eremuetatik hiri-eremuetarako migrazioa da, betirakoa edo aldi luze baterakoa izaten zena. Arrazoi nagusiena ekonomikoa zen.

Emigranteak: Galiziako, penintsularen barrualdeko eta Andaluziako ekialdeko eskualde atzeratuetatik zetozen.

Joaten ziren helmugak: Kataluniako, EAEko eta Madrilgo industria-guneak; geroago, Mediterraneoko eta Ebroren harana, Levante, Balearrak eta Kanariak.

Nekazarien exodoan bost etapa bereiz daitezke:

• XIX. mendearen amaiera eta 1930 artean: Nekazarien exodoa neurrizkoa izan zen. Arrazoiak:

  • Landaguneetan eskulana sobera egotea, filoxeraren krisiagatik eta labore-lurren mekanizazioagatik.

  • Lanpostuak sortu ziren industrian.

  • Herri-lanen gorakada, Primo de Riveraren diktaduran.

• 1931 eta 1950 artean: Nekazarien exodoa gelditu egin zen. Arrazoiak:

  • 1930eko hamarkadako krisi ekonomikoa.

  • Gerra Zibila.

  • Gerraostea.

  Hiriek hornidura-arazo larriak izan zituzten; industriak lan-eskaintza murriztu zuen, gerrak eragindako hondamendiengatik, zaila zelako suntsitutakoa berreraikitzea. Bestalde, frankismoak landako biztanleria landa-eremuetan geratzea sustatu zuelako.

• 1951 eta 1975 artean: Nekazarien exodoak goia jo zuen, batez ere 1960ko hamarkadatik aurrera. Arrazoiak:

  • Hazkunde demografikoa.

  • Nekazaritza tradizionalaren krisia, mekanizazioak eragindakoa.

  • Garapen-planen ondoriozko industriaren loraldia.

  • Turismoaren booma.

• 1975etik aurrera: Nekazarien exodoak behera egin zuen. Krisia zela eta, migrazio-saldo positiboa murriztu edo are negatibo bihurtu zen. Krisiaren ondoren, nekazarien exodoa murrizteko lagungarriak izan dira nekazaritzaren teknifikazioa, landa-garapeneko politikak sustatzea, eta landa-ingurunean industriak, zerbitzuak eta hiri-bizitegiak ezartzea.

• Gaur egun: Nekazarien exodoa oso txikia da.

Barne Migrazio Tradizionalen Ondorioak

• Demografian:

  • Migrazioek biztanleriaren banaketan dauden desoreken zergatia azaltzen dute: barrualdea hustea eta periferian eta Madrilen dentsitate handiak egotea.

  • Sexuaren araberako egituran eragina izan dute, maskulinitate-indizea handitu dutelako.

  • Adin-egituran ere eragin dute, landaguneetan geratutako biztanleria zahartu eta hiri-biztanleria gaztetu egin delako.

• Ekonomiaren arloan: Landa-eremuetan migrazioek, hasieran, biztanleriak baliabide gehiago izatea ekarri zuten, baina, denborarekin, jende gazte eta gaituena joatean produktibitatea eta errendimendua jaitsi egin baitziren.

• Arlo sozialean: Asimilazio-arazoak sortu ziren, emigranteak balio tradizionaleko landa-komunitate batetik gizarte hiritar eta lehiakor batera lekualdatzean.

• Ingurumenaren arloan: Ekosistema tradizionalak abandonaturik geratu ziren. Hiri handietan, hainbat arazo ekarri zituen, hala nola atmosferaren kutsadura, zarata eta hondakinak.

Gaur Egungo Barne Migrazioak

Ezaugarriak

• 1975eko krisitik gaurdaino izan dira.

• Migrazioaren bolumena apaldu egin zen, nekazarien exodoak behera egin zuelako.

• Migrazioaren zergatiak askotarikoagoak dira: enplegua, etxebizitza, ikasketak…

• Emigratzen duten pertsonak ere askotarikoagoak dira: adinean, prestakuntzan eta jatorrian.

• Migrazio-korronteak noranzko anitzekoak dira.

Gaur Egungo Barne Migrazioko Korronteak

Migrazio-korronte Motak

• Laneko migrazioak enpleguarekin lotuta daude, eta heldu gazteak izaten dira protagonistak. Landagune atzeratuetatik, gainbeheran dauden hiri industrializatuetatik eta hiriguneetatik datoz.

• Etxebizitzarekin lotutako migrazioetan, etxebizitza merkeen bila dabiltzan gazteak edo ingurumen-kalitate handiko eremuetan bizi nahi duten klase ertain edo diruduneko heldu gazteak lekualdatzen dira.

• Itzulerako migrazioak biztanleria jatorrizko emigrazio-eremuetara itzultzean datza. Krisi ekonomikoaren eta industria birmoldaketaren ondorioz erretiroa edo aurretiko erretiroa hartutako pertsonak izaten dira.

• Ohiko edo pendulu-mugimenduak lana, ikasketak edo aisia direla medio egiten diren aldizkako lekualdatzeak dira.

Aldaketak Migrazio-korronteen Fluxuetan

• Beste eskualde batzuetako probintzietarako migrazioek pisua galdu dute.

  • Saldo positiboak dituzte, emigrazio-probintzia izanik joera hori irauli dutenek, inguruko probintzietako hiri handietara (adibidez, Toledok eta Guadalajak Madrildik jasotakoak).

  • Saldo negatiboak dituzte biztanleria urria dutelako, jarduera tradizionalak gailentzen direlako, eta historikoki emigratzaileak izan diren zenbait probintziak (adibidez, Zamora, Soria).

  • Saldo aldizka positiboak eta negatiboak dituzte: krisialdietan probintzia emigratzaile batzuek saldo positiboak izan ditzakete emigranteak itzultzen direlako; eta saldo negatiboak, krisiak sakonki eragiten dienean, emigrante horiek galtzen dituzten probintzia immigratzaile batzuek.

  • Hazi egin dira eskualde bereko probintzien edo probintzia bereko udalerrien arteko migrazioak. Arrazoiak:

    • Ekonomia-jardueren eta biztanleriaren zati bat inguruko udalerri merkeagoetara hedatu izana.

    • Landa-garapenerako politiken bultzadaz.

Gaur Egungo Barne Migrazioen Ondorioak

• Laneko migrazioek autonomia-erkidegoen eta probintzien barneko desoreka demografiko eta ekonomikoak areagotzen dituzte.

• Etxebizitzarekin lotutako hiri barneko migrazioek hiriguneko eremu igorleen zahartzea eta kanpoalde hartzaileetan biztanleriaren hazkundea eragiten dute.

• Emigranteen itzulerako migrazioek erretiratuak hartzen dituzten eremuak zahartzea eta gazteenek negozio edo jarduera berriak sortzea eragiten dute.

• Lanarekin eta ikasketekin lotutako pendulu-mugimenduek zirkulazio-arazoak sortzen dituzte hiri handietako sarbideetan.