Recursos Naturales: Importancia, Clasificación y Desarrollo Sostenible

1. O medio e os recursos naturais

Os recursos naturais son os elementos proporcionados pola natureza que teñen unha utilidade para as persoas. Obtéñense do solo e o subsolo, do relevo, da auga, da atmosfera e da vexetación.

1.1. Os recursos do solo, o subsolo e o relevo

• O solo: É o soporte dos asentamentos e da actividade agraria, e constitúe a base sobre a que medran e se alimentan as plantas silvestres, os animais e os cultivos dos que viven as persoas.
• O subsolo: A capa profunda do terreo situada baixo a terra cultivable achéganos minerais e rochas, cuxa explotación se realiza mediante a minería. Ademais, proporciona fontes de enerxía, como a xeotérmica, que aproveita a calor interna da Terra.
• O relevo: Pode constituír tamén un recurso turístico, sobre todo nos lugares onde dá lugar a praias areosas ou a formacións xeolóxicas de gran beleza, como o Gran Canón do Colorado ou a Cidade Encantada de Cuenca.

1.2. Os recursos da auga, a atmosfera e a vexetación

• A auga (doce e salgada): É un recurso imprescindible para a supervivencia dos seres vivos. Proporciona alimentos, como o peixe, e emprégase para a rega agraria, a produción mineira, as centrais hidroeléctricas, a fabricación industrial e o transporte de mercadorías. A auga é tamén fundamental nos fogares, nas cidades e en actividades de lecer, como a navegación recreativa, a pesca deportiva e os parques acuáticos.
• A atmosfera: Proporciona fontes de enerxía, como o sol e o vento, e condicións climáticas que favorecen actividades de lecer, como o turismo de sol e praia ou o de neve.
• A vexetación: Proporciona alimentos para as persoas e os animais (froitos, pastos); materias primas para diferentes industrias (papel, moble, perfumería, farmacia); fontes de enerxía (leña, usada como combustible); e lugares de lecer e esparexemento.

1.3. O futuro dos recursos

Para garantir o futuro dos recursos, cómpre utilizalos de forma equilibrada, evitando o seu malgasto e sobreexplotación. É necesario lograr unha maior eficacia na súa utilización e reciclar, na medida do posible, os recursos non renovables.

Por iso, na actualidade foméntase en todo o mundo o desenvolvemento sostible: un uso racional dos recursos que permita o seu desfrute polas xeracións presentes e futuras.