Administración e Xurisdición Laboral en Galicia

Administración e Xurisdición Laboral

A Administración e os Xulgados do Social son os que velan polo cumprimento da lexislación laboral.

Órganos da Administración Laboral

Na Administración Laboral (que inclúe a Seguridade Social) aparecen varios órganos:

Ministerio de Emprego e Seguridade Social

Consellería de Economía, Emprego e Industria

Inspección de Traballo e Seguridade Social

É un órgano administrativo que controla as condicións de traballo en xeral: condicións laborais, de Seguridade Social, de Prevención de Riscos Laborais, etc.

A Inspección pode levantar diferentes actas de infracción que terán como consecuencia expedientes sancionadores en función das infraccións detectadas pola Inspección.

Competencias da Inspección de Traballo e Seguridade Social

• Vixiar e controlar o cumprimento da normativa.
• Asesoramento.
• Mediación en conflitos laborais.
• Suspensión de traballos en caso de risco grave e inminente.
• Propostas de sancións por incumprimento normativo.

(Ver modelo de denuncia en anexos de documentación colgados na aula virtual)

Instituto Nacional da Seguridade Social (INSS)

Encárgase do recoñecemento do dereito á asistencia sanitaria, do recoñecemento de prestacións económicas na modalidade contributiva, etc.

Tesouraría Xeral da Seguridade Social (TXSS)

É un servizo común que unifica todos os recursos financeiros da Seguridade Social. Ten como funcións: a inscrición de empresas, afiliación, altas e baixas dos traballadores, xestión e control da cotización, recadación de cotas, etc.

Servizo Estatal Público de Emprego (SEPE) e Servizo Público de Emprego de Galicia

Teñen como funcións a xestión das prestacións por desemprego, a organización de servizos de emprego, a formación profesional dos traballadores, a aplicación de políticas de emprego, etc.

Entidades Colaboradoras na Xestión da Seguridade Social

Poderíanse considerar como entidades colaboradoras as Mutuas de Accidentes de Traballo e Enfermidades Profesionais. Son asociacións autorizadas polo Ministerio de Traballo e Inmigración que teñen as seguintes competencias:

• Xestionar as continxencias profesionais.
• Colaborar na xestión da incapacidade temporal por continxencias comúns.
• Realizar actividades de prevención de riscos laborais, etc.

A Xurisdición Social: Resolución de Conflitos

Cando hai un conflito laboral ou de Seguridade Social débese ter en conta o seguinte proceso:

1. Servizo de Mediación, Arbitraxe e Conciliación (SMAC)

   Intentarase chegar a un acordo ante o SMAC ou órgano equivalente da Comunidade Autónoma correspondente. Se hai acordo, o conflito remata neste momento; se non, hai que acudir ao órgano que corresponda da Xurisdición Social.

   (Ver modelo en carpeta de anexos de documentación)

2. Xulgado do Social

   Coñece, en primeira instancia, os procesos en materia sociolaboral: reclamación de cantidades, despedimentos, conflitos colectivos, etc.

3. Sala do Social do Tribunal Superior de Xustiza de Galicia

   Coñece de conflitos colectivos e sindicais que exceden da provincia, pero non superan o ámbito da Comunidade Autónoma, e resolve os recursos de suplicación interpostos ás sentenzas do Xulgado do Social.

4. Sala do Social da Audiencia Nacional

   Coñece procesos relativos á liberdade sindical ou aos conflitos e convenios colectivos que exceden da Comunidade Autónoma, etc.

5. Sala do Social do Tribunal Supremo

   Resolve os recursos de casación que se interpoñen contra as sentenzas dos Tribunais Superiores de Xustiza e da Audiencia Nacional.

Extinción do Contrato Laboral

A extinción do contrato significa que o contrato remata e, polo tanto, as partes teñen que saldar as súas obrigas.