Aditzak jokatuak

Gurasoek emandako diruARI (ez diruaren) esker,  etxea EROSI ahal izan dugu.

• Esker posposizioak  nori/zeri eskatzen du aurretik.

• Aditza ahal partikularen aurretik idazten da.

Hainbat irakaslEK (ez irakasleek) bizkaieraz egiten du (ez dute) berba ikasleekin.

• Determinatzaile zehaztugabeekin doazen izenak mugagabean deklinatzen dira.

• Mugagabeak aditza singularra eskatzen du, zenbakiak izan daitezke salbuespen.

Irakasleek hartu duten erabakia ez da guretzaT (ez guretzako) ona.

• Norentzat kasuan deklinatzen den izenak -tzat atzizkia hartu behar du, ez baitu izenik ondoren.

Lagunak  amorru biziZ (ez biziarekin) erantzun dio.

• “Nola erantzun” adierazi nahi du eta ez “norekin/ zerekin erantzun”.

Erakutsi dizut (ez dizkizut) ariketa hauek nola egin.

• Esaldiko nor, nori eta norkek lotura behar dute aditzarekin.

Senar-emazteak etxe berean (ez berdinean) sartu ziren.

• Esaldian aipatzen den etxea bakarra da eta ez konparatzen diren bi edo gehiago.

Badugu lagun bat etortzen dENA (ez dela) egunero Bilbotik.

• Erlatibozko esaldian konpletiboetan erabiltzen den menderagailua (-ela) erabili da.

Idazleak eta irakurleak iritziak elkarri (Ez elkar) azaldu zizkioten.

• Elkar partikula deklinatu egiten da, esaldian adierazten duenaren arabera.

Oso prestatuta ikusten duzu zure burua (ez zara) lan horretarako.

• Euskaraz erreflexiboa -ren burua erabiliz adierazten da.

Atzo zein ondo nengoen jakin bazenu, lasterka etorriko zinatekeen/ zinen (ez zinateke).

• Baldintza lehenaldian dagoenez, ondorioa ere lehenaldian adierazi behar da.

Aurten maiatzean ospatuko dugu ikastolaren (ez ikastolako) jaia.

• Noren/ zeren jaia adierazi nahi da eta ez nongo jaia.

Igo motorrera eta etxeraino eramango (ez eramaten) zaitut.

• Aditzak adierazten duen ekintza, oraindik gertatzeko dagoenez, -go aspektu marka hartu behar du.