Abreviaturas e Siglas: Normas e Exemplos
Enviado por Chuletator online y clasificado en Otras lenguas extranjeras
Escrito el en 
gallego con un tamaño de 2,54 KB
A abreviación (I). Abreviaturas e siglas
Nos textos escritos empregamos as abreviacións como un recurso de economía lingüística que nos permite redactar con maior rapidez e evitar repeticións. Esta representación breve de palabras ou frases máis longas pode realizarse por medio de recursos diversos. Nesta unidade analizaremos dous deles: a abreviatura e a sigla.
A abreviatura é a representación das palabras na escrita con só algunhas ou unha das súas letras.
Para formar unha abreviatura, debemos ter en conta as seguintes regras:
Lembra
As abreviaturas lense como a palabra que representan (r/ > rúa).
- As abreviaturas son de libre creación, isto é, calquera palabra é susceptible de ser acurtada cunha abreviatura. Porén, convén non empregalas abusivamente.
- Nunca se deben abreviar os topónimos formados por varias palabras: Santiago de Compostela, e non *Santiago de C.
- Cando unha oración acaba nunha abreviatura, o punto desta funciona como punto final: Apañou ameixa, berberecho, navalla etc.
- As letras da palabra que se adoitan incluír na abreviatura son as do principio (teléfono > tel.) aínda que tamén se poden tomar do final (principal > ppal.).
- Rematan sempre nun punto, agás as que se grafan con barra (s/n > sen número).
- Admiten flexión de número. As abreviaturas que constan de varias letras engaden un -s ao final (sres. > señores); as que acurtan a palabra cunha soa letra, duplícana e gráfana en maiúsculas (AA. VV. > asociacións de veciños; estación de FF. CC. > estación de ferrocarrís).
- Conservan o acento gráfico cando a vogal tónica acentuada forma parte do acurtamento: núm. > número; máx. > máximo.
A sigla é unha formación léxica que resulta da escolla de cada letra inicial dunha frase ou enunciado pleno.
As siglas axústanse, igualmente, a unha serie de normas:
- Adecúanse ao xénero do substantivo principal da frase: a RAG (Real Academia Galega); a sida (síndrome de inmunodeficiencia adquirida); o BOP (Boletín Oficial da Provincia).
- Nunca levan punto final nin teñen forma de plural: o DNI / os DNI; o CD / os CD.