Tipos de Comunicación e Problemas na Transmisión de Datos

Tipos de Comunicación

Tipos de liña segundo a topoloxía

• Punto a punto: Interconectan dous dispositivos.
• Multipunto: Interconectan máis de dous dispositivos.

Segundo a sincronización

A sincronización é a problemática de escoller o momento no que o receptor debe ler o dato que se está a enviar. Se le no momento errado, o dato lido non será correcto.

• Síncrona: Ademais de transmitirse sinais que representan os datos a enviar, transmítese información sobre o momento no que o receptor ten que ler. Normalmente, un sinal de sincronización que adoita viaxar por unha liña de comunicacións separada.
• Asíncrona: Non se transmite ningún sinal específico ou información específica de sincronización. Non obstante, o emisor e o receptor deben ter algún mecanismo para sincronizar o envío e recepción de información, como por exemplo, ter dous reloxos sincronizados, ou analizar certos patróns do sinal para así poder saber cando se comeza a transmitir cada símbolo.

Segundo a explotación do circuíto

• Símplex: Na liña só circula información nun sentido.
• Dúplex: A información circula nos dous sentidos.
• Half-dúplex: A información circula nos dous sentidos, pero nunca simultaneamente. Débense turnar os envíos e as recepcións, como cando se empregan walkie-talkies.

Segundo o número de liñas

• Serie: Existe só unha liña pola que se transmite un só sinal.
• Paralelo: Existen varias liñas en paralelo polas que se transmiten varios sinais simultaneamente.

Segundo a natureza da información

• Analóxica: A información que se transmite é de natureza analóxica. Por exemplo, un sinal de voz, un sinal de TV, etc. Un exemplo é a telefonía analóxica, xa que o que se transmite é un sinal analóxico coa forma de onda da voz.
• Dixital: A información que se transmite é dixital. É dicir, son datos que se poderían almacenar nun ficheiro. É información que podemos representar en bits. Por exemplo, a telefonía GSM, xa que os teléfonos converten a voz en información dixital, e son os bits de información o que se transmite pola rede.

Comunicacións segundo as opcións de entrega

• Unicast: A mensaxe ten un único destinatario.
• Multicast: Varios destinatarios.
• Broadcast: Destinado a todo o mundo.

Problemas nas Transmisións

• Ruído: Chámase ruído a calquera sinal incoherente que potencialmente se pode mesturar co noso sinal, cambiándoo e facendo así que non se reciba exactamente o que se enviou. Con incoherente quérese dicir que non é un sinal recoñecible, cun formato intelixible. Existen varios tipos, pero o máis coñecido é o ruído branco. Este é un sinal completamente aleatorio e impredecible, que está formado por compoñentes de todas as frecuencias por igual, sendo así capaz de deteriorar calquera sinal.
• Atenuación: É o fenómeno que consiste en que o sinal perda potencia.
• Distorsión: Este fenómeno consiste en que o sinal se "deforma" de xeito non lineal.
• Interferencias e autointerferencias: Consiste en que outro sinal se mestura co que nos interesa, facendo así que o que se recibe sexa diferente do que se enviou.