Tecido Muscular e Nervioso: Estrutura e Funcións Esenciais

Tecido Muscular

O tecido muscular presenta pouca matriz extracelular e está constituído por fibras musculares. No citoplasma destas fibras (sarcoplasma) aparecen unha gran cantidade de miofibrilas formadas por filamentos de proteínas contráctiles, onde destacan a actina (filamentos finos) e a miosina (filamentos grosos), que percorren toda a lonxitude da fibra muscular.

Tipos de Tecido Muscular

• Tecido Muscular Estriado: Constituído por fibras musculares polinucleadas. O estriado da fibra débese ós miofilamentos dispostos en bandas paralelas e intercaladas en unidades repetitivas denominadas sarcómeros.
• Tecido Muscular Liso: Formado por células pequenas unidas entre si cun só núcleo en posición central. O liso débese ós miofilamentos dispostos en paralelo ao eixe maior da célula.

Os músculos son fibras musculares unidas por tecido conectivo. Existen diferentes tipos de músculo:

Tipos de Músculo

• Músculo Esquelético: Composto por fibras de tecido muscular estriado. A súa contracción é rápida, voluntaria e pouco resistente á fatiga (músculo que move os ósos).
• Músculo Cardíaco: Formado por fibras de tecido muscular estriado cun só núcleo. A súa contracción é coordinada, rápida e involuntaria (corazón).
• Músculo Liso: Formado por tecido muscular liso. A súa contracción é lenta, involuntaria e resistente á fatiga (tubo dixestivo).

Tecido Nervioso

Constitúe todas as estruturas do sistema nervioso, caracterízase pola escasa presenza de matriz extracelular. Está formado por dous tipos de células: as neuronas e as células da glía.

Entre as súas funcións destacan a condución da información sensorial, a elaboración de respostas en centros especializados e o transporte destas ata os órganos que as executan.

A Neurona

A neurona está especializada na produción e transmisión de impulsos nerviosos.

• Dendritas: Ramificacións que parten do corpo neuronal que actúan como receptor do impulso nervioso.
• Axón: Prolongación alongada do corpo neuronal encargada da transmisión do impulso nervioso.
• Corpo Neuronal ou Soma: Contén un núcleo central cun voluminoso nucléolo.

Células da Glía

As células da glía realizan funcións de sostemento, nutrición, recheo, illamento e protección das neuronas. Tipos:

• Astrocitos: Presentan numerosas ramificacións.
• Células de Schwann: Envolven os axóns das neuronas do sistema nervioso periférico cubríndoos con mielina.
• Oligodendrocitos: Son células máis pequenas e menos ramificadas. Proporcionan mielina aos axóns de neuronas do sistema nervioso central.
• Microglía: Posúen moitas ramificacións. Teñen capacidade fagocítica e protexen as neuronas de axentes infecciosos.