Revolución Agraria e Primeira Revolución Industrial: Transformacións Económicas e Sociais

A Revolución Agraria

A revolución agraria é un conxunto de cambios e transformacións que deron lugar a un novo modelo agrario que substituíu o do Antigo Réxime.

Principais cambios

Novos sistemas de cultivo

Destaca a eliminación do barbeito gracias á introdución da rotación de cultivos sobre a mesma parcela.

Renovación técnica constante

Mellora e perfeccionamento da ferramenta polo aumento do emprego do ferro e de novos arados e aparellos mecánicos para sementar, mallar e segar.

Especialización agraria e incremento dos rendementos

A agricultura pasou de ser de autosuficiencia e policultivo a especializada e comercial, con producións destinadas a ser vendidas no mercado.

Cambios no réxime de propiedade da terra

Mediante novas leis, as grandes extensións de terras comunais pasaron a converterse en propiedade privada individual. Ademais, foron eliminadas as trabas e cargas fiscais de orixe feudal.

Cambio na mentalidade dos propietarios

Fronte aos do Antigo Réxime, que se conformaban coas rendas pagadas polos campesiños arrendatarios, converteron a terra nunha fonte de beneficios.

A Primeira Revolución Industrial

A Primeira Revolución Industrial é o conxunto de transformacións económicas e sociais que tiveron lugar no sistema de produción de mercadorías a partir de mediados do século XVIII.

Orixe e características principais

Os primeiros síntomas do cambio tiveron lugar en Inglaterra no século XVIII.

• Invención de máquinas cada vez máis especializadas na función que realizan, e a mecanización das tarefas produtivas.
• Emprego da enerxía do vapor como forza motriz, grazas á invención da máquina de vapor por James Watt en 1769, así como o emprego do carbón como materia prima calorífica.
• Instalación de fábricas: unidades de produción formadas por unha ou varias instalacións dotadas de máquinas e nas que se concentran traballadores asalariados. Estes obreiros realizan tarefas especializadas baixo o control dunha dirección centralizada que aplica un rígido código de disciplina.

Sectores punteiros

Industria téxtil do algodón

Foi o primeiro sector no que se produciu a mecanización e a transformación industrial. En Europa aumentou a demanda de tecidos de algodón estampados de procedencia oriental, e moitos talleres de Inglaterra comezaron a fiar.

Industria siderometalúrxica

Foi o segundo sector en industrializarse debido á crecente demanda de ferro para as novas ferramentas e máquinas. No Antigo Réxime a produción de ferro era escasa e baseábase na fundición do mineral mediante combustión de madeira. As innovacións permitiron empregar o carbón como fonte calorífica para fundir mellor e en maiores cantidades.

O ferrocarril

O aumento da produción agraria, mineira e industrial estimulou a invención deste novo medio de transporte. A aplicación da máquina de vapor no arrastre de vagóns culminou coa invención de Stephenson: a locomotora e o ferrocarril.

• En 1825 circulou en Inglaterra o primeiro tren mineiro.
• En 1830 circulou o primeiro tren de pasaxeiros.

O ferrocarril converteuse no símbolo do progreso.