Plastikoak eta Material Zeramikoak: Ezaugarriak eta Erabilerak

Plastikoak: Sintesiko Polimeroak

Egungo plastiko gehienak sintesi bidez sortutako polimeroetan oinarritzen dira. Horren arabera, multzo hauek bereizten dira:

Plastiko Motak

Termoplastikoak

Beroarekin moldeatzeko moduko substantziak dira; berotzean ez dute aldaketa kimikorik izaten eta hozten direnean egoera solidoa berreskuratzen dute, egitura aldatu gabe.

Termoegonkorrak

Beroarekin moldeatzeko moduko substantziak dira, baina aldaketa kimikoa izaten dute berotzean; beraz, hoztu eta solidotzen direnean, forma horrekin geratzen dira betiko.

Elastomeroak

Substantzia elastikoak dira, itxuragabetu eta berriz bere jatorrizko formara bueltatzeko gaitasun handia dute.

Plastikoen Aplikazioak

Plastikoek pisu arina dute, haien osaera-prozesuak merkeak dira eta egonkortasun kimiko handia dute. Kostu nahiko txikia dute, batez ere lehengaiak lortzeko energia gutxi behar delako.

Plastikoen ezaugarri bereziak direla eta, oso elementu interesgarriak dira material mistoak fabrikatzeko. Adibidez: plastikoa + beira = segurtasun-beira; plastikoa + ehuna = tapizeriako materiala.

Birziklapena

Plastikoak ia suntsiezinak dira usteltze eta korrosio prozesuen aurrean. Horregatik, plastikoak dira egungo kutsatzaile handienetakoak.

Konponbideak

Arazo hau konpontzeko:

• Produktu ez-biodegradagarrien erabilera murriztu eta haien aplikazioak zorrotz kontrolatu behar dira.
• Birziklatze-teknikak garatu behar dira; teknika horiek etorkizun handia dute plastikoen kasuan.

Birziklatze Motak

Erraustea

Plastikoak lortzeko lehengai-iturri nagusietako bat petrolioa denez, plastikoak petrolioa ustiatzeko prozesuaren bitarteko etapa gisa har daitezke, eta prozesu hori haien errekuntzarekin amaitzen da energia berreskuratzeko.

Suspertzea

Plastiko mota bereko hondakin erabilien kantitate nahiko handia bilduz gero, hori berriro produkzio-katean sar daiteke, zenbait bide erabiliz. Adibidez, poliuretanozko aparrak jatorrizko osagaietan deskonposa daitezke, hidrolisi izeneko prozeduraren bitartez.

Pirolisia

Tratamendu horretan, plastikoak 400-800 °C bitarteko tenperaturan berotzen dira, oxigenorik gabe. Horrela, hainbat produktu kimiko lor daitezke, batzuk lehengai gisa berrerabiltzeko modukoak.

Material Zeramikoak

Ezaugarriak

Ezaugarri nagusiak gogortasuna, hauskortasuna eta zurruntasuna dira. Material zeramikoek egitura kristalino konplexua izan ohi dute, eta askotan aglomeratzaile bat izaten dute osagaien artean.

Beirak

Material zeramiko bereziak dira, gehienetan gardenak edo zeharrargiak, eta batez ere silikatozko disoluzio solidoz osatuta daude.

Beira lauzko lamina handiak eztainu urtuzko oinarrietan flotatzen duten bitartean solidotzen uzten dira, prozesua erraztuz. Oraindik beirazko elementu asko artisau-tekniken bidez fabrikatzen badira ere, ontzien industria-produkzioa automatizatuta egon ohi da.

Zementua eta Aplikazioak

Zementua hareaz, legarrez eta urez nahasita, hormigoia sortzen da. Hormigoia ingeniaritza zibilaren oinarrizko materiala da. Aglomeratzaile gisa, urarekin eta harearekin proportzio desberdinetan nahastuz, masa bat eratzen da, eta horrekin teilak, hustubide-hodiak, erretenak eta abar egin daitezke.

Zementuarekin egindako produktuen fabrikazio-prozesua masari hezetasuna ematean eta fraguatu (gogortu) arte itxarotean datza. Batzuetan, propietate mekanikoak hobetzeko, zentrifugatu egiten da.

Zurezko edo metalezko moldeetan sartuta eta, normalean, 28 egun igaro ondoren bertatik aterata, era askotako elementuak fabrikatzeko aukera ematen du.