Institucións e movementos históricos na Península Ibérica

Aula Regia

Institución consultiva das monarquías xermánicas na Alta Idade Media, particularmente importante no reino visigodo, onde tamén recibe o nome de consilium. Participan nel os principais dignatarios que axudaban nas decisións que os reis tomaban e elixían ao propio monarca xa que a monarquía era electiva. Herdeiras da Aula Regia foron as Cortes e parlamentos. Pode facer referenza asemade ao propio espazo físico do Salón do Trono.

Bárbaros

Termo pexorativo que procede do grego e significa “balbucear”. Pobos en xeral que non falaban grego ou latín. Estranxeiros que foron penetrando no imperio romano a través de desprazamentos de poboación (migracións), ás veces violentamente e enfrontándose cos romanos e axudando á caída do imperio no V d. C. (por exemplo hunos, visigodos, xermanos...).

Castro

Poboado fortificado celta, de orixe prerromano e de notoria importancia no noroeste peninsular (cultura castrexa). Son lugares de poboamento, os máis antigos da idade do bronce, que perviviron á ocupación romana ata a idade media, onde foron abandoados. Normalmente, non sempre, situados en cumios rochosos, tiñan murallas e vivendas circulares ou elípticas.

Conventus

Asamblea ou reunión conxunta de romanos e indíxenas que aconsellaban ao gobernador na administración de xustiza na península ibérica. Fan referenza tamén ás divisións administrativas e territoriais (non fixas), cunha capital e onde o gobernador exerce xustiza, recada impostos e recluta tropas. Son territorios máis pequenos que as provincias e maiores que unha civitas. Gallaecia estaba formada polos conventi de Lucus Augusti, Bracara Augusta e Asturica Augusta.

Economía depredadora

Tipo de actividade económica de subsistencia característica do paleolítico que utiliza o que a natureza ofrece, sen repoñer o que toma. Comprende actividades como a recolleita, a caza e a pesca. Está en contraposición da economía productiva típica a partir do neolítico (agricultura e gandeiría).