Ikusmenaren Akatsak: Miopia, Hipermetropia eta Presbizia

Ikusmenaren Akatsak: Miopia, Hipermetropia eta Presbizia

Ikusmen-akatsak kristalinoaren eta kornearen ezaugarriekin lotuta daude. Akats horiek zuzentzeko, leiarrak erabili ohi dira.

Presbizia (Ikusmen nekatua)

Akats hau pertsona helduek jasan ohi duten moldaketa-ahalmenaren galerak sortzen du. Ikusmen nekatua dutela ere esaten da. Adinarekin, muskulu ziliarren uzkurtzeko ahalmena txikitu egiten da, eta, horren ondorioz, moldatzeko ahalmena ere bai. Hori gertatzen denean, gertuko puntua urrundu egiten da, eta distantzia motzetan ongi ikustea zailagoa da.

Zuzenketa

Presbizia zuzentzeko, leiar konbergenteak erabili ohi dira. Leiar horiek objektuaren irudia pertsonaren gertuko puntura eramaten dute.

Miopia (Urruneko ikusmen zaila)

Akats horren ondorioz, zailagoa da urruti dauden objektuak ongi ikustea. Pertsona miopeek ohi baino kristalino konbergenteagoa dute. Horregatik, gertu dauden objektuak ongi fokuratzen dituzte, baina urruti dauden objektuetatik datozen izpiek erretinara iritsi aurreko puntu batean bat egiten dute, eta, horren ondorioz, irudi lausoa eratzen da erretinan.

• Begi miope baten urrutiko puntua begi arrunt batena baino gertuago dago.

Zuzenketa

Miopia leiar dibergente batekin zuzentzen da. Horrela, leiar + kristalino multzoak urrutiko objektuaren irudia erretinan eratzen du. Leiarraren fokuak begi miopearen urrutiko puntuarekin bat egin behar du. Horrela, leiarrak ikusi nahi den urrutiko objektuaren irudi birtual bat eraikitzen du puntu horretan.

Hipermetropia (Gertuko ikusmen zaila)

Akats honen ondorioz, zailagoa da gertu dauden objektuak ongi ikustea. Pertsona hipermetropeen kristalinoa ez da ohi bezain konbergentea. Urruti dauden objektuak ongi ikusten dituzte, baina gertukoak gaizki; izan ere, errefraktatutako izpiek ez dute bat egin oraindik erretinara iristen direnean.

• Begi hipermetrope baten gertuko puntua begi arrunt batena baino urrutiago dago.

Zuzenketa

Hipermetropia leiar konbergente batekin zuzentzen da. Hala, leiarrak eta kristalinoak osatutako multzoaren fokua erretinaren gainean jartzen da. Leiar konbergenteak gertuko objektuaren irudi birtual bat eratzen du begi hipermetropearen gertuko puntuan.

Astigmatismoa

Astigmatismoa duten pertsonek kornea deformatuta izan ohi dute; errugbiko baloi batean bezala, haien kornea ez da horizontalki bezain kurbatua izaten bertikalki. Hori dela eta, begiak ez ditu gertuko objektuak behar bezala fokuratzen, ez eta urrunekoak ere; izan ere, objektu batetik datorren argia leku desberdinetatik sartzen da korneara, eta leku desberdinetan fokuratzen da.

Zuzenketa

Astigmatismoa leiar zilindrikoekin zuzentzen da, eta ez esferikoekin.