Hirugarren Sektoreko Zerbitzuak: Gizartea eta Enpresa

Zerbitzu Sozialak

Hezkuntza

Bistakoa da zenbaterainoko garrantzia duen hezkuntzak, ez bakarrik norbanakoentzat, baita gizarte osoarentzat ere. Batetik, norberaren autonomia, gizarteratzea eta lanbide-trebekuntza errazten ditu; bestetik, funtsezkoa da herrialdeek aurrera egin dezaten zientziaren, teknikaren eta kulturaren alorrean.

Herrialde gehienen helburu nagusiak honako hauek izaten dira:

• Derrigorrezko eskolaldia ezartzea (hau da, biztanle guztiek hezkuntza jasotzea).
• Zerbitzuaren doakotasuna finantzatzea.
• Aukera-berdintasuna sustatzea.

Estatuak esku hartzen du hezkuntzan: Hezkuntza-mailak, irakasgaiak, ikasturteak eta etapak arautzen ditu. Hezkuntza-sistema baten maila neurtzeko, hainbat kalitate-adierazleri erreparatzen zaie.

Osasuna

Osasuna pertsona guztien oinarrizko premia da, lehentasunez bete beharrekoa. Horretarako zerbitzuen bidez, herritarrek bizitzeko eta bizi-baldintza duinak izateko duten eskubidea bermatu nahi da.

Horregatik, helburu nagusia osasun-sistema ona ezartzea da, biztanleriaren osasuna hobetzeko, pertsonen bizialdia luzatzeko eta, prebentzioaren eta tratamenduen aldetik, herritarren arteko desberdintasunak murrizteko.

Inbertsio ikaragarri handiak egiten dira, teknologiaz ondo hornitutako osasun-etxeak eta osasunaren arloko langileak ordaintzeko. Osasun-politikaren arrakasta neurtzeko, hainbat adierazle hartzen dira kontuan: bizi-itxaropena, haurren heriotza-tasa...

Enpresentzako zerbitzuak

Enpresen administrazioa edo kudeaketa eta banku-zerbitzuak ere hirugarren sektorekoak dira.

Enpresen administrazioa

Enpresa-kudeaketarekin zerikusia duten ekonomia-jarduera asko biltzen ditu, hala nola:

• Giza baliabideak
• Kontabilitatea
• Zergak

Enpresa-kudeaketaren jarduerek garrantzi ekonomiko handia dute, enplegua sortzen dutelako eta langile espezializatuak behar dituztelako. Herrialde garatuetan, hirugarren sektoreko enpleguen %20-25 arlo honetan dago, eta zerbitzuen kalitatea gero eta hobea da.

Orain arte, kudeaketa-lanak enpresan bertan egiten ziren. Gaur egun, ordea, gero eta ohikoagoa da mota askotako zerbitzuak egiten dituzten kudeaketa-enpresak zeregin horietaz arduratzea. Enpresek kanporatu egiten dituzte zerbitzu batzuk, baita ekoizpena bera ere.

Finantza-jarduerak

Finantzen arloko zerbitzuek diru-mugimenduak bideratzeko jarduerak biltzen dituzte.

Finantza-erakundeek artekari gisa jokatzen dute eragiketa horietan, eta hainbat motatakoak daude: bankuak, aurrezki-kutxak edo balio-agentziak.

Finantza-erakunde gehienek hainbat zerbitzu eskaintzen dizkiete enpresa eta pertsonei, interesen edo komisioen truke. Hauek dira zerbitzurik erabilienak:

• Maileguak
• Aurrezkien kudeaketa
• Moneta-trukea

Langile askorik erabiltzen ez duten arren, finantza-jarduerak oso garrantzitsuak dira, etekin handiak sortzen dituztelako eta ekonomian berealdiko eragina dutelako.

Gaur egun, banku-sektorean kontzentrazioa nagusitzen ari da.

Kontsumitzaileentzako zerbitzuak: Turismoa

Aisialdiko jarduerak astialdian egiten ditugunak dira: ikuskizunak, kirola, ostalaritza eta turismoa. Azken urteotan, ekonomiaren aldetik turismoa da garrantzitsuena.