Grandes Figuras da Literatura Galega: Cunqueiro, Fole e Neira Vilas

Grandes Figuras da Literatura Galega

Este documento presenta a obra de tres autores fundamentais na literatura galega do século XX: Álvaro Cunqueiro, Ánxel Fole e Xosé Neira Vilas.

Álvaro Cunqueiro

Álvaro Cunqueiro é un autor dunha extensa obra poética, narrativa e teatral. Foi tamén articulista en xornais e revistas e publicou varias obras de ensaio.

Novelas destacadas:

• Merlín e familia: Retorna a figura mítica do mago Merlín, adaptándoo a un tempo presente e a un escenario galego: o Pazo de Miranda, en terras luguesas.
• As crónicas do sochantre: A acción sitúase na Bretaña francesa e está protagonizada por un músico que se dirixe a tocar nun enterro e é recollido por unha carroza na que viaxan varios defuntos. Durante anos percorrerá con eles o país e irá escoitando historias das súas vidas pasadas.
• Se o vello Sinbad volvese ás illas: Son retratos de personaxes populares vinculados coa tradición oral nos que, mediante o humor e a fantasía, presenta a psicoloxía do home galego e as circunstancias do seu vivir.

Ánxel Fole

Ánxel Fole foi un mestre do relato curto. A súa obra narrativa está formada principalmente por catro libros de contos.

Narrativa:

Os dous primeiros libros de contos (Á luz do candil e Terra brava) están ambientados na Galicia rural da alta montaña luguesa. Neles reflicte os modos de vida da Galicia de mediados do século XX e ofrece abundante información acerca do mundo rural.

Os dous últimos libros (Contos da néboa e Historias que ninguén cre) comparten unha ambientación urbana: sitúanse na cidade de Lugo e continúan cos temas de medo, misterio e experiencias paranoicas dos libros anteriores.

A técnica narrativa de Fole está baseada no conto popular de tradición oral. Ademais, recorre tamén á técnica do conto enmarcado, ao presentar uns personaxes que se xuntan para contarse historias.

Fole reproduce nas súas obras a lingua falada nas zonas luguesas.

Xosé Neira Vilas

Xosé Neira Vilas é autor dunha amplísima obra literaria. Na súa narrativa diferenciamos novelas e relatos.

Clasificación da súa narrativa:

As súas obras narrativas podemos clasificalas desde dous puntos de vista:

• Segundo o espazo no que se sitúan as historias: Galicia / América.
• Segundo o protagonista que as presenta: infantil / adulto.

Temas da narrativa:

• A Galicia rural: retrato da Galicia campesiña da posguerra, caracterizada pola miseria, os prexuízos, a dominación política…
• A emigración galega: presenta a vida dos emigrantes galegos en América, os problemas de adaptación ao mundo urbano…

Memorias dun neno labrego conta desde a óptica do neno protagonista, Balbino, a vida dun rapaz nunha aldea do interior de Galicia e presenta as súas inquedanzas e frustracións.

É tamén autor de obras nas que fai un percorrido pola súa propia vida, a modo de memorias persoais: Lar, Pan e Nai.

Neira Vilas é un dos primeiros autores de literatura infantil galega: Espantallo amigo, O cabaliño de buxo. E de obra poética: Cantarolas.

Tamén escribiu varios libros de investigación nos que analiza a contribución dos emigrantes galegos a América: Galegos no golfo de México, Castelao en Cuba.

Na obra de Neira Vilas destaca a variedade de técnicas narrativas empregadas e a riqueza e a calidade do seu léxico.