Espainiako Turismoa: Eremuak, Guneak eta Eraginak

Turismo-Espazioak: Definizioa eta Motak

Turismo-espazioak oso handiak izan daitezke, nazioarteko eta estatuko turista ugari erakartzen dituztenak (turismo-eremuak), edo gune turistiko bakartuak, alderdi erakargarri zehatzei lotutakoak (turismo-guneak), adibidez, eski-estazioak eta landa-turismoko guneak. Turismo-espazioetan, turismo-guneak eta turismo-eremuak sartzen dira.

Espainiako Turismo-Eremu Nagusiak

• Katalunian, Costa Brava (Bartzelonatik iparraldera) eta Costa Daurada (Bartzelonatik hegoaldera).
• Valentziako Erkidegoan, Costa Blanca dago (Alacanteko kosta).
• Murtzian, Manga del Mar Menor dago.
• Andaluzian, Costa del Sol dugu turismo-eremu nagusi. Bigarren mailan, Costa Tropical dago, Granadako kostan. Horiez gain, azken urteotan eremu berriak garatu dira Almeriako kostan eta Cadiz-Huelva bitarteko itsasertzean, Costa de la Luz.
• Uharteak: Kanariak eta Balearrak. Bertan kontzentratzen da Espainiako hotel-eremuen ia %20. Balearretan, turismoak urtarokotasun handia du, udako oporrei lotuta baitago; Kanarietan, aldiz, bertako klima subtropikalari esker, urte osoan izaten dira turistak.
• Galiziako eta Bizkaiko Golkoko erkidegoak ez daude hain masifikatuta. Eremu horien erakargarritasuna era askotako paisaiak, kultura eta tenperatura jasangarriagoak dituzten udak izatea da.
• Madril hiri bisitatuena da, estatuko zein atzerriko turismoa erakartzen baitu, eta ia ez du turismo-urtarokotasunik. Kultura- eta negozio-turismoan oinarritzen da bere eskaintza.

Turismoaren Ondorioak

Demografia-Ondorioak

Kostaldean populazioak gora egiten du, gazteak lan bila doazelako eta adinekoak bertan kokatzen direlako, arrazoi terapeutikoak edo aisialdikoak direla medio. Landa-eremuetan, turismo berdeagatik, edo hiri historikoetan, kultura-turismoari esker, emigrazioa leundu egin da.

Ekonomia-Ondorioak

Turismoak lanpostuak sortzen ditu; kontuan izan behar da 2023ko bigarren hiruhilekoan biztanleria aktiboaren %13,6k sektore honetan lan egiten zuela. Dena den, lanpostu gehienak urtarokoak dira.

• Beste jarduera ekonomiko batzuetan eragin biderkatzailea du.
• BPGaren %12 ematen du gutxi gorabehera; horregatik, Espainiako oparotasun ekonomikoaren zutabe nagusienetakoa da.
• Merkataritza-balantza orekatu eta kanpoko zorra murrizten du.
• Zerbitzu, ekipamendu eta azpiegituren hornidura hobetzen du. Adibidez, garraiobideen politikan eragina du, Europarekin komunikazioak errazten lagundu duen neurrian.

Politika, Kultura eta Gizarte-Ondorioak

Turismoaren eraginez, herrien arteko kultura-harremanak sustatzen dira; gainera, tokiko bizimoduetan eragina du, aldaketen aldeko joera bultzatzen duelako.