Desadaptación de impedancias en amplificadores e altavoces
Desadaptación de impedancias
Un amplificador actúa coma unha fonte de alimentación de baixa impedancia de saída. Deste xeito, a tensión entregada á saída é independente do valor da carga conectada.
Un amplificador está deseñado para entregar a máxima potencia sobre certa carga. A máxima cantidade de enerxía que entrega o amplificador conséguese cando existe adaptación de impedancia, é dicir, cando a impedancia dos altavoces conectados ao amplificador coincide coa impedancia mínima de carga especificada polo fabricante.
Se a impedancia do conxunto de altavoces conectados é maior, a cantidade de potencia entregada será menor. En todo caso, a impedancia equivalente dos altavoces conectados nunca debe ser inferior á impedancia de carga do amplificador, debido a que podería danarse, xa que entregaría maior potencia da que foi deseñado para soportar.
Os principais problemas da conexión directa de altavoces a un amplificador débense á desadaptación de impedancias provocada porque a carga conectada non coincide coa especificada polo amplificador e pola resistencia que introduce o cableado da instalación, debido ás perdas da liña de distribución.
Tipos de desadaptación de impedancia
- Desadaptación de impedancia da carga: Cando a carga conectada ao amplificador non se corresponde coa nominal especificada polo fabricante, este non pode entregar a potencia nominal.
- Desadaptación de impedancia por efecto da resistencia dos condutores: Por mor da baixa impedancia dos altavoces, a influencia da resistencia dos condutores que conectan estes co amplificador pode afectar ao rendemento do sistema.
A resistencia da liña de transmisión depende da lonxitude total da liña e da sección do cable empregado. Canto maior sexa a lonxitude do cable e menor a súa sección, maiores serán as perdas da liña de transmisión. As perdas débense a que parte da potencia entregada polo amplificador pérdese na liña de transmisión, pero tamén debido á desadaptación de impedancias motivada por un aumento da resistencia de carga que ve o amplificador.