Biotecnoloxía e enxeñaría xenética: conceptos e procesos

Biotecnoloxía: concepto e aplicacións

A biotecnoloxía consiste na utilización de seres vivos ou parte deles co fin de obter produtos de interese para as persoas.

Usos principais da biotecnoloxía

• Produción de substancias terapéuticas: obtidas a partir de microorganismos modificados xeneticamente para producir substancias importantes para as persoas.
• Produción de alimentos: permite aumentar a produtividade de certas colleitas e obter plantas resistentes a pragas e a algunhas condicións ambientais.
• Eliminación de metais pesados: permitiu o desenvolvemento de bacterias capaces de eliminar os compoñentes da actividade industrial mediante reaccións químicas.
• Biorremediación: consiste no uso dalgúns fungos e bacterias para eliminar substancias contaminantes para o medio.
• Produción de enerxía: por exemplo, pódese obter gas metano a partir da fermentación de residuos orgánicos dos refugallos.

Enxeñaría xenética e ADN recombinante

A enxeñaría xenética consiste na manipulación do ADN dun organismo para conseguir un obxectivo práctico. Lévase a cabo mediante a transferencia dun ou máis xenes dun organismo a outro. O organismo transxénico é o que ten un xenoma modificado por xenes doutros organismos. O ADN sintetizado de maneira artificial chámase ADN recombinante.

Elementos necesarios

• Encimas de restrición: proteínas bacterianas que cortan o ADN en puntos concretos.
• Vector de transferencia: é o axente que transfire un segmento do ADN dun organismo a outro.
• ADN ligasas: son encimas que se encargan de unir fragmentos de ADN.

Fases dun proxecto de enxeñaría xenética

1. Localización e illamento do xene que se desexa transferir.
2. Selección do vector.
3. Unión do ADN elixido ao ADN do vector.
4. Inserción do vector co xene transferido na célula hospedadora.
5. Multiplicación do organismo transxénico.

Expresión xénica e código xenético

O ARN descodifica a información xenética do ADN para formar así un polipéptido.

Etapas da expresión xénica

1. Transcrición da mensaxe: cópiase a información xenética do ADN a unha molécula de ARNm. A dobre hélice ábrese e unha das súas cadeas constitúe o molde para a molécula de ARNm (A-U, C-G).
2. Tradución da mensaxe: o ARN traslada a información desde o núcleo ata o citoplasma, onde os ribosomas len a información en forma de tripletes. Cada triplete forma un codón. Tradúcese á linguaxe das proteínas e cada codón especifica un aminoácido concreto. O ARNt transporta os aminoácidos ao ribosoma.

O código xenético

Cada molécula de ARNt ten nos seus extremos un aminoácido concreto e un triplete de nucleótidos que se chama anticodón, complementario dun codón determinado do ARNm.

Código xenético: correspondencia entre os codóns do ARNm e os aminoácidos que forman as proteínas.