As Fases Clave da Revolución Francesa: Do Antigo Réxime á Asemblea

Principais etapas da Revolución Francesa

A revolta dos privilexiados

Prodúcese pola oposición do estamento privilexiado ás medidas que os ministros de Luís XVI (Calonne, Brienne, etc.) tentaron aplicar para paliar o déficit galopante do Estado francés. Estes idearan que a nobreza e o clero contribuísen ás arcas do Estado por medio dun imposto sobre a propiedade agraria. Cómpre lembrar que un dos privilexios que posuían estes grupos era precisamente o de estar exentos de pagar impostos.

Ao apreciaren que os seus tradicionais dereitos non serían respectados, opuxéronse a tal pretensión e solicitaron ao rei a convocatoria dos Estados Xerais, unha asemblea de orixe medieval na que tamén tiña presenza o Terceiro Estado (o pobo) e que non se reunía desde 1614. O obxectivo inicial desa convocatoria non era outro que discutir sobre os problemas da Facenda; porén, ben pronto a atención centraríase noutros asuntos.

Os Estados Xerais

Os Estados Xerais reuníronse en Versalles o 5 de maio de 1789, coa concorrencia dos tres brazos estamentais: aristocracia, clero e o Terceiro Estado. O seu propósito era resolver o problema do déficit que afectaba o Estado francés. Non obstante, esta asemblea serviu de plataforma reivindicativa para o pobo, que, contando cun número de compoñentes que igualaba os dos outros dous xuntos, expuxo que as votacións se fixesen individualmente, é dicir, cada deputado, un voto, e non por estamentos, ao que tanto a nobreza coma o clero se negaron.

O Xuramento do Xogo da Pelota

O 20 de xuño de 1789, ante a imposibilidade de facelo no salón onde se celebraban os Estados Xerais, os deputados do pobo reuníronse na sala do xogo de pelota. Alí xuraron dar a Francia unha constitución e terminar co absolutismo monárquico. Este acto transcendental é coñecido como o "Xuramento do Xogo da Pelota".

A Asemblea Nacional-Constituínte (1789-1791)

Reunidos os deputados do Terceiro Estado, erixíronse en Asemblea de carácter nacional, xurando solemnemente elaborar para Francia unha constitución que limitase o poder do rei. A Asemblea Nacional convertíase, dese modo, en Constituínte.

O 14 de xullo de 1789 foi asaltada a Bastilla, cárcere real situado en París e símbolo do absolutismo, iniciándose así o proceso revolucionario. A Asemblea Constituínte tomou medidas fundamentais:

• Aboliu os privilexios feudais.
• Proclamou a Declaración dos Dereitos do Home e do Cidadán, establecendo a liberdade e a igualdade das persoas.
• Aprobou a Constitución de 1791, que declaraba a Francia unha monarquía de carácter limitado ou constitucional, onde rexía a división de poderes e a soberanía nacional.

O principal grupo promotor destas reformas foi o dos "xirondinos", o sector moderado dos revolucionarios.

Olympe de Gouges: unha voz feminista na Revolución

Olympe de Gouges (Montauban, 1748 - París, 1793) foi unha prolífica escritora política que se manifestou claramente contra a represión xacobina e contra Robespierre e Marat. Acusada de ser unha realista reaccionaria, foi guillotinada en 1793.

Con todo, as súas obras foron á vez profundamente feministas e revolucionarias. Exaltada polas ideas da Revolución Francesa, publicou en setembro de 1791 un manifesto titulado A Declaración dos Dereitos da Muller e da Cidadá, tomando como modelo a Declaración de 1789 e aplicándoo de maneira exhaustiva ás mulleres.