Administrazio Publikoa: Kontzeptua, Motak eta Inpartzialtasun Printzipioa

Administrazio Publikoa: Kontzeptua eta Motak

Administrazioaren Kontzeptua

Administrazioa botere exekutiboaren barnean kokatzen den eta herri interesak (interes publikoa) objektibotasunez eta Legearen eta zuzenbidearen menpekotasun osoz asetzen dituen antolaketa da.

Administrazio Publikoaren Motak

1. Estatuaren Administrazio Orokorra.

2. Autonomia Erkidegoetako Administrazioak.

3. Toki Administrazioa osatzen duten entitateak: Udalak, Foru Aldundiak, etab.

4. Sektore publiko instituzionala:

   • Administrazio publikoei loturik edo haien mendean dagoen edozein organismo publiko eta zuzenbide publikoko erakunde.

   • Administrazio publikoei loturik edo haien mendean dauden zuzenbide pribatuko erakundeak, zeinak lege honetan xedatutakoaren mende geldituko baitira berariaz haiei buruzkoak direnean eta, beti, administrazio-ahalak baliatzen dituztenean.

   • Unibertsitate publikoak.

Administrazio Organoen Inpartzialtasun Printzipioa

Inpartzialtasun Printzipioa

Administrazio Publikoek interes publikoak objektibotasunez (inpartzialak izanda) zerbitzatzen dituzte. Objektibotasun honek, beste gauza batzuen artean, administrazio organoen inpartzialtasuna eskatzen du. Espediente (prozedura) bakoitzean inpartzialtasun hau bermatzeko, LSPk parte ez hartzea eta errefusatzea aurreikusten ditu.

Parte Ez Hartzea

1. Hurrengo zenbakian aipatutako egoeraren batean dauden administrazioko agintari edo langileek ez dute prozeduran parte hartuko, eta horren berri emango diote beren nagusiari, bidezkoa dena ebatz dezan.

2. Parte ez hartzeko arrazoiak (partzialak izateko) hauek dira:

   1. Interes pertsonala izatea aztertzen den gaian edo gai horretako ebazpenak eragin diezaiokeen beste batean; sozietate edo erakunde interesdun bateko administratzaile izatea, edo interesdunen batekin ebatzi gabeko auziren bat izatea.

   2. Ezkontza-lotura edo ezkontzaren antzeko lotura eta laugarren maila arteko odol-ahaidetasuna edo bigarren maila arteko ezkontza-ahaidetasuna izatea interesdunetako edozeinekin, erakunde edo sozietate interesdun bateko administratzaileekin, edo prozeduran esku hartzen duten aholkulari, legezko ordezkari edo mandatariekin, edo horien bulego berekoa izatea edo horiekin elkartuta egotea aholkularitza, ordezkaritza edo mandataritzan.

   3. Aurreko letran aipatutako lagunetakoren batekin adiskidetasun estua edo etsaitasun nabarmena izatea.

   4. Dagokion prozeduran aditu edo lekuko gisa aritzea.

   5. Gaian zerikusi zuzena duen pertsona fisiko edo juridikoren batekin zerbitzu-harremana izatea edo pertsona horri azken bi urteetan edozein modutan, baldintzatan eta tokitan lan-zerbitzuak eskaini izatea.

3. Goragoko organoek espedientean parte ez hartzeko agindu diezaiekete aurreko puntuan azaldutako inguruabarren batean daudenei.

4. Administrazio publikoetako agintari edo langileek abstenitzeko arrazoiren bat izanik jardun badute, kasu guztietan, parte hartu duten egintzak ez dira nahitaez baliogabeak izango.

5. Inguruabar horietan parte hartu behar ez eta parte hartzen duenak erantzukizuna izango du.

Errefusatzea

24. artikuluan arautzen da. Funtzionario batek parte hartu behar ez duenean eta parte hartzen duenean ematen da.

1. Aurreko artikuluan adierazitako kasuetan, prozeduraren edozein unetan errefusa dezakete interesdunek.

2. Idatziz aurkeztuko da errefusatzea, arrazoiak adierazita.

3. Errefusatuak, biharamunean, alegatutako arrazoia beragan betetzen den ala ez esango dio bere nagusiari. Lehen kasuan, nagusiaren ustez errefusatzeko arrazoirik badago, ordezkoa jartzea erabaki dezake berehala.

4. Errefusatuak ez badu errefusatzearen arrazoia onartzen, nagusiak 3 egun izango ditu ebazteko, bidezko deritzen informazioak bildu eta frogak lortu ondoren.

5. Ezin da errekurtsorik aurkeztu errefusatzearen gaineko ebazpenen aurka; hala ere, errefusatzea alega daiteke prozedura amaitzen duen egintzaren aurka errekurtsoa jartzerakoan.

Prozedura erabaki batekin amaituko da.